Sebuah Puisi: Feisbuk Pe Kerja

Feisbuk Pe Kerja

[Iswan Sual]

ni so bukang malam lei

matahari smo ampe rkaluar e

mar mata blum suka tatutu

panta masi suka dudu

jarejare manari trus di atas tuts

dapa rasa masi fruk

tape mata ternyata nyanda "wuruk"

sadiki le ayang smo bakuku

ini samua karna feisbuk

sorupa orang sibuk

lupa isi akang tu puru

saki mag ka ruma saki mo rujuk

mo brenti mar tagantong

pe banyak balaik deng komen

jadi narsis

tatawa sandiri korang sama iblis

woi sadar woi

jang nya tasisa di popoji doi

bis itu baminta ki'i

nyanda malu ngoni?

Makassar, Senin amper siang, 17 September 2012

Sebuah Puisi: Cirita di Tahuna

Cirita di Tahuna

[Iswan Sual]

Smo satu minggu

Tatanang disini batunggu

Kapal ka Marore nanti datang hari Rabu

Pastiu kita cuma dudu-dudu

                Tahuna jadi tampa basingga

                Satupun disini nya kita pe sudara

                Dompet so lebe tipis

                Amper-amper smo manangis

Untung, dapa tamang pambae

Antar  tiap hari pa depe sudara

Ttete deng nene pagi malam

teru makang di meja for kita

                Makase banya Opo Kasuruang

                Ngana pe berkat datang pas kita perlu

                Makase banyak Opo Kasuruang

                Jaga pa kita salalu

Ngana kirim malaikat waktu kita di tanah orang

Pengganti mama deng papa

Pengganti kaka ade

Bukang main dang kita pe mujur

                Trus bagitu

                Trus salalu

                Karna nda ada Ngana kita cuma tana

                Karna Ngana bajao kita sengsara

               

Sebuah Puisi: Bukang Maeng Dang

Bukang Maeng Dang

[Iswan Sual]

Bukang maeng dang

Dorang pe susa

Bis dofoma

Bis nyawa

                Mar ta salut

                Saban hari di laut

                Itang kalu itang

                Ilang kalu ilang

Untung pemerenta so sadiki sadar

Kalu nda, nae bendera Filipina

Untung penguasa so ja taru kira

Kalu nda, slamat tinggal Nusantara

                Siasia Gajah Mada pe usaha

                Nda guna sumpa Palapa

                Papua smo talapas

                Di sana punung mas

Awas le jang Marore deng Miangas baku iko

So itu kwa jang tapusat trus di Jawa

Kong torang dapa depe sisa

Ngoni kira torang biongo

                Bukang maeng dang

                Dorang pe susa

                Kalu omba kencang

                Samua warung jadi tampa ba utang

Tahuna, 1 November 2012

Sebuah Puisi: Bage Jo

Bage Jo

[Oleh Iswan Sual]

Sandiri nintau mo apa

Kamar pe benaut

Cuma nyamu deng bifi mera

Bakuriki baisap bacucu

          Satu hari di warnet

          Nyanda puas

          Sampe mata baaeraer

          Sampe depe ongkos amper dapa bayar

Ni kos pe sunyi mampos

Deripada men, lebe bae ambe polpen

Amber kertas kong mulai batulis

Apa jo, yang penting pulang ongkos

          Rekengrekeng, ini nanti jadi warisan

          For anak cucu

          Spaya dorang lei tau

          Torang ini tou Nga’asan

Ha! Napa tre so ujang

Langit le iko bablits

So remembok

Tutu talinga jang pongo

          Seng bataria goros

          Mata so suka tidor

          Masi fruk

          Mar, bage jo!

Tahuna, 1 November 2012

Sebuah Puisi: DOE NI LAKILAKI

DOE NI LAKILAKI

Do e ni lakilaki

Tabuka tatutu mulu smo bagabu

Mangael ikang di laut maya

Jago skali dia baflas

          Badekat pa Wewene pake jarejare

          Sampe depe keyboard pung pang pung

          Bakuriki cako kata

          Depe laste parampuang tolak mantamanta

Do e ni lakilaki

Bagabs pa Keke nda lialia

Sambarang tada

Tunjung tu brani

          Nda perna sto bakaca

          Kong top bole jo

          Nda perna dia dalang hati batanya sto

          Sama langit deng bumi dong pe beda

Do e ni lakilaki

Pasang jurus ruci

Deng sagala aksi

Cumucumu orangtua pe doi

          Nya malu

          Nya sadar diri

          Tiap hari deng blackberry

          Bicara so pake gue elu

Tahuna, 4 November  2012